“Сутайн бор” клубын Удирдах Зөвлөлийн гишүүн, доктор А.Батсүхээс Монгол Улсын Их Сургуулийн Бизнесийн Сургуульд мэргэжлийн ном товхимолууд бэлэглэлээ.

Нийт 91 ширхэг ном товхимол багтжээ. Дийлэнх ном зохиол нь англи хэлээр хэвлэгдсэн бөгөөд манай улсын их, дээд сургуулиудад эдийн засаг-бизнесийн чиглэлээр суралцаж буй оюутнуудын эрэлт хэрэгцээг харгалзан шилж сонгожээ. Номыг МУИС-ийн Бизнесийн сургуулийн захирал доктор, профессор Ч.Энхбаяр, номын сангийн эрхлэгч Л.Эрдэнэбулган нарт өнөөдөр хүлээлгэн өглөө. Номын бэлэг гардуулах ёслолд Олон Улсын Уулын Холбооны Залуучуудын Комиссын гишүүн О.Батсайхан, “Сутайн бор” клубын менежер О.Номин, Д.Түмэнцэцэг нар оролцлоо. МУИС-ийн Бизнесийн сургуулийн захирал, доктор, профессор Ч.Энхбаяр: ”Билэгт сайн энэ өдөр ном товхимолууд хүлээн авч байгаадаа баяртай байна. Ирээдүйн мэргэжилтэн судлаачдыг бэлтгэх үйлсэд хувь нэмэр болох нь дамжиггүй билээ. Цаашид ч ном зохиолууд нэмж хандивлаасай хэмээн хүсч байна. Мөн манай сургуулийн магистр, докторантурын оюутнуудад багшлах урилга маань үргэлж нээлттэй байгааг дахин сануулья. Номын цагаан буян өнөд дэлгэрэх болтугай!” хэмээн ерөөв.

Дашрамд дурьдахад, доктор А.Батсүх нь Санхүүгийн Их Сургууль/СЭЗДС/-ийн Эрдэмийн зөвлөлийн гишүүн, Удирдлагын Академийн зөвлөх профессор бөгөөд ОХУ-ын Эрхүү хотын Байгалийн Эдийн Засаг, Хуулийн Улсын Их Сургуулийн профессор нэгэн юм.

“Номын утга нь тэнгэр мэт агуу, дэлхий мэт өргөн, далай мэт гүн. Номыг унших нь тэнгэрт нисэж, дэлхий тойрч, далайд хөвөх мэт” (Ц.Дамдинсүрэн)