Монгол Улсын Их Сургуулийн Бизнесийн сургууль (хуучнаар Эдийн засгийн сургууль) Монгол улсад эдийн засаг, бизнесийн удирдлагын тэргүүлэх мэргэжилтэн бэлтгэх үйлсэд анхдагч байж, улс орныхоо хөгжлийн түүчээ болсон төрийн болон бизнесийн удирдлагын чадварлаг боловсон хүчнийг бэлтгэх үүргээ нэр төртэй биелүүлэн ирсэн ууган сургууль билээ.
“Бизнес Консалтинг Төв” МУИС-ийн Эдийн засгийн сургуулийн харъяанд 2005 оны 11-р сарын 28-наас “Бизнес сургалтын төв” нэртэйгээр үйл ажиллагаагаа явуулж төр, хувийн хэвшлийн байгууллага, ААН-д сургалтын үйл ажиллагаа явуулж эхлэсэн ба 2009 оноос “Бизнес Консалтинг Төв” болон үйл ажиллагаагаа өргөтгөн сургалт, судалгаа, зөвлөх үйлчилгээний чиглэлээр ажиллаж байна.
Бизнес консалтинг төвийн үйл ажиллагааны чиглэл
Бизнес консалтинг төв нь дараах чиглэлүүдээр төр, хувийн хэвшлийн байгууллагуудтай хамтран ажиллана. Үүнд:
- Эдийн засаг, бизнесийн судалгааны чиглэлүүд: Эдийн засаг, бизнесийн орчин, салбар, зах зээл, өрсөлдөгч, хэрэглэгч, бүтээгдэхүүний судалгаа хийх, төслийн техник, эдийн засгийн үндэслэл (ТЭЗҮ) боловсруулах,
- Байгууллагын хөгжил өөрчлөлт, менежментийн зөвлөх үйлчилгээ, сургалт, судалгааны чиглэлүүд: Компанийн засаглал, стратеги, байгууллагын соёл, зан төлөв, хүний нөөц, маркетингийн удирдлага, санхүү, нягтлан бодох бүртгэл, мэдээллийн системийг хөгжүүлэхэд чиглэсэн төлөвлөгөө боловсруулах, хэрэгжүүлэх,
- Мэргэжил дээшлүүлэх, мэргэшсэн ажилтан бэлтгэх чиглэлээр:
- “ХАА-ны мэргэшсэн ажилтан бэлтгэх” сургалт (Үнэлгээний хороонд орж ажиллах эрх бүхий сертификат олгох) “Тендерт амжилттай оролцох нь” (Улсын тендерт оролцох сонирхолтой, оролцдог компаниудад зориулсан сургалт
- “Компанийн засаглалын мэргэшсэн ажилтан” бэлтгэх сургалтыг өмчийн хэвшил үл хамааран зохион байгуулдаг
Бүтэц бүрэлдэхүүн
Төв нь хоёр (2) үндсэн ажилтантай, гэрээний үндсэн дээр Бизнесийн сургуулийн 80 гаруй багш судлаачидтай хамтран ажиллаж байна.
Бизнес консалтинг төв сургалт, судалгаа гэрээт ажлыг гүйцэтгүүлэх зорилгоор сургуулийн нийт багш, судлаачидтай хамтран ажилладаг. Манай сургуульд 124 багш, ажилтан нар ажиллаж байна. 72 багш үндсэн орон тоогоор ажиллаж байгаагийн 47 хувь нь эрдмийн зэрэг цолтой ба үүнээс доктор, профессор 6, доктор, дэд профессор 18 ажиллаж байна. Монгол Улсын эдийн засаг, бизнесийн салбарт судалгаа, шинжилгээний ажил гүйцэтгэсэн, эрдмийн бүтээлээ практикт нэвтрүүлэх чиглэлээр байгууллага, аж ахуй нэгжтэй олон жил үр бүтээлтэй багш нар маань манай төвийн үйл ажиллагаанд оролцон, хамтран ажилладаг.
Нийт багш нарын 50 орчим хувь нь буюу 47 багш өндөр хөгжилтэй оронд PhD зэрэг хамгаалсан, мэргэжлийн болон хэлний өндөр түвшний мэдлэгтэй багш нар ажиллаж байгаа нь тус сургуулиар гүйцэтгүүлсэн аливаа гэрээт ажлыг онол арга зүйн өндөр түвшинд гүйцэтгэх боломжийг олгодог.
Манай төв хамтын ажиллагааны гэрээний хүрээнд JICA болон олон улсын бусад байгууллагуудаас зөвлөх авч ажиллуулах боломжтой ба Монгол-Японы хүний нөөцийн хөгжлийн төв, ОХУ-ын Дорнод Сибирийн Технологийн Улсын Их Сургууль зэрэг сургуулиудтай хамтын ажиллагааны санамж бичгийн дагуу зочин доктор профессоруудыг урьж хамтран ажиллаж байна.
Бизнес консалтинг төв өнгөрсөн хугацаанд 80 гаруй багш, судлаачидтай хамтран ажиллан, захиалагчийн гэрээт ажил, сургалтуудыг хугацаанд нь чанартай гүйцэтгэсэн болно. Бидний голлон ажилласан туршлага бүхий чиглэлүүд:
- 1. Компанийн бизнес төлөвлөгөө, стратеги төлөвлөгөөний аргачлалыг боловсруулах, стратегийн зорилго, зорилтуудыг тогтвортой хөгжлийн үзэл баримтлалт нийцүүлэх чиглэлээр:
- Эрдэнэт үйлдвэр ТӨҮГ
- Цахилгаан дамжуулах үндэсний сүлжээ
- Эрчим хүчний зохицуулах хороо
- 2. Компанийн хангамжийн бараа материалын удирдлага, аюулгүй нөөцийн удирдлагын чиглэлээр:
- Эрдэнэт үйлдвэр ТӨҮГ
- Багануур ХК
- 3. Төсвийн болон төслийн зардал санхүүжилтийн хяналт үнэлгээний чиглэлээр:
- Монгол Улсын 2023 оны төсвийн урьдчилсан гүйцэтгэлд монеторинг хийсэн
- 4. Компанийн засаглалыг бэхжүүлэх, засаглалын талаар мэргэшил, мэдлэг болгох зорилгоор сургалт, зөвлөн туслах үйлчилгээ үзүүлэх чиглэлээр:
- Вояж компани
- Их дээр сургуулийн багш нарт зориулсан сургалт
- 5. Худалдан авах ажиллагааны чиглэлээр:
- Худалдан авах ажиллагааны мэрэгсэн ажилтан бэлтгэх сургалтыг жилд 20 орчим удаа зохион байгуулан Таван толгой ХК, ТЭЦ-IV ТӨҮГ болон төсөвт албан байгууллагуудтай хамтран ажилладаг.
- Тендерт оролцогчдод зориулсан сургалтуудыг зохион байгуулан, тендерт амжилттай оролцоход нь зөвлөн тусалдаг
Компаниудын хөрөнгө оруулалт, санхүүгийн удирдлага, менежментийн зөвлөх үйлчилгээ, сургалт, судалгааны чиглэлээр нилээдгүй компаниудтай ажиллаж, туршлага хуримтлуулж байна. Мөн Монгол-Японы хүний нөөцийн хөгжлийн төвтэй хамтран Бизнесийн удирдлагын үндсэн сургалтыг 5 дах жилдээ амжиллтай зохион байгуулж байна.