МУИС-ийн Бизнесийн сургуулийн Санхүүгийн тэнхимийн 2019- 2020 оны хичээлийн жилийн намрын улирлын Бакалаврын оюутны эрдэм шинжилгээний хурал зохион байгуулагдана

МУИС-ийн Бизнесийн сургуулийн Санхүүгийн тэнхимийн 2019- 2020 оны хичээлийн жилийн намрын улирлын Бакалаврын оюутны эрдэм шинжилгээний
хурлын удирдамж

СЭДЭВ: САНХҮҮГИЙН САЛБАРЫН ТУЛГАМДСАН АСУУДЛУУД

Эрдэм шинжилгээний хурлын зорилго

Оюутнуудын бүтээлч сэтгэлгээг хөгжүүлэх, эрдэм шинжилгээ, судалгааны ажлын арга барилд сургах, хичээлээр үзсэн онолын мэдлэгийг практиктай холбох, туршлага солилцоход оршино.

Эрдэм шинжилгээний хурал дараах үе шаттайгаар зохион байгуулагдана.

1. Илтгэл ирүүлэх хугацаа: 2019-11-11-ны өдрийн 17:00 цаг
2. Мэргэжлийн багш нарын үнэлгээгээр хамгийн өндөр оноо авсан эхний 10 хүртэлх илтгэлээр шалгарсан тухай мэдээллийг Е-майлээр хүргүүлэх: 2019-11-13-ны өдрийн 17:00 цаг
3. Шалгарсан илтгэлүүдийг IV байрны №314 тоот өрөөнд хэлэлцүүлэх: 2019-11-15-ны өдрийн 14:00 цаг

Эрдэм шинжилгээний бүтээлд тавих ерөнхий шаардлага:

1. Судалгааны ажил нь бизнесийн удирдлага болон санхүүгийн салбарын /банк, даатгал/ чиглэлээр байх бөгөөд шинжлэх ухааны онол, арга зүйд үндэслэсэн байх,
2. Судалгааны тодорхой арга, аргачлал хэрэглэхээс гадна сэдвийн практик ач холбогдлыг дээшлүүлэхийн тулд холбогдох тооцооллыг бодит өгөгдөл дээр тулгуурласан байх,
3. Судалгааны ажлын үр дүнд үндэслэсэн санал зөвлөмж нь оновчтой, практикт хэрэгжих боломжтой байх,
4. Судалгааны ажил нь анх удаа хэлэлцүүлэгдэж байгаа,
5. Судалгааны ажлаар хэлэлцүүлэх илтгэлийг ганцаарчилсан болон багаар бэлтгэж болох бөгөөд удирдагч багштай байна,
6. Илтгэлийг РРT хэлбэрээр бэлтгэх бөгөөд илтгэх хугацаа 10 минут, хэлэлцэх хугацаа 5 минут байна.

Илтгэлийн бүтэц, бичиглэл, судалгааны ажлын боловсруулалтад тавих шаардлага:

• Илтгэл нь дэвшүүлсэн зорилго, үндсэн хэсэг (онол, практик судалгааны боловсруулалт), дэд сэдвүүд, судалгааны дүгнэлт, санал, эх сурвалж, ашигласан бүтээлийн жагсаалт гэсэн ерөнхий бүтэцтэй байх;
• Ишлэл зүүлт ашигласан байх;
  
• Судалгааны ямар арга ашигласан нь тодорхой байх;
• Илтгэл нь нүүр хавтастай байна. (Нүүрэнд сургууль, тэнхим, илтгэлийн нэр, удирдагч багш, илтгэгчийн нэр, e-mail хаяг, утас зэргийг бичих)
  
• Илтгэлийг А4 цаасны дээр болон доороос нь 2.0, зүүнээс нь 3.0, баруунаас нь 2.0 см зайтай, Times New Roman фондоор бичих, үсгийн өндөр 12pt, мөр хоорондын зай 1.15, 10-12 хуудсанд багтсан байх.
• Санхүүгийн тэнхимийн хурлаас эхний 3 байрт шалгарсан илтгэлийг Бизнесийн сургуулийн оюутны эрдэм шинжилгээний хурлаар хэлэлцүүлнэ.

Илтгэлийг 2019 оны 11 дүгээр сарын 11-ний өдрийн 17:00 цаг хүртэл цахим хэлбэрээр finstudentconference@gmail.com хаягаар, мөн хэвлэмэл байдлаар IV байрны №111 тоот өрөөнд хүлээн авна.

САНХҮҮГИЙН ТЭНХИМ

“НЯГТЛАН БОДОХ БҮРТГЭЛИЙН ӨНӨӨГИЙН ЧИГ ХАНДЛАГА, НИЙГЭМД ҮЗҮҮЛЭХ НӨЛӨӨ” уулзалт хэлэлцүүлэг боллоо

Нягтлан бодох бүртгэлийн тэнхимийн 2019-2020 оны хичээлийн жилийн Оюутныг хөгжил төлөвшилд чиглүүлэх үйл ажиллагааны хүрээнд 2019 оны 10 сарын 29ны өдөр МУИС-ийн номын сангийн 502 тоот өрөөнд 1997 оны нягтлан бодох бүртгэлийн салбарын төгсөгч Мэргэшсэн Нягтлан бодогчдын институтын Удирдах зөвлөлийн дарга бөгөөд Ерөнхийлөгч Б.Түвшин “Нягтлан бодох бүртгэлийн өнөөгийн чиг хандлага, нийгэмд үзүүлэх нөлөө” сэдвээр уулзалт, хэлэлцүүлэг хийлээ. Уулзалтын хүрээнд оролцогч салбарын хөгжлийн чиг хандлага, ажил олгогчийн зүгээс тавигдах гол шаардлага зэргийн талаар дэлгэрэнгүй мэдээлэл хийж сонирхсон асуултанд хариуллаа. Уг хэлэлцүүлэг уулзалтанд нягтлан бодох бүртгэлийн салбарын 3, 4-р түвшний 150 гаруй оюутан оролцсон байна.

Нягтлан бодох бүртгэлийн тэнхим

“САНХҮҮГИЙН ЗАХ ЗЭЭЛИЙН ХӨГЖЛИЙН ЧИГ ХАНДЛАГА” сэдэвт олон улсын эрдэм шинжилгээний хурал зохион байгуулагдана.

МУИС-ийн БС-ийн Санхүүгийн тэнхим болон ОХУ-ын Плехановын нэрэмжит ЭЗИС-ийн УБ дахь салбар сургууль жил бүр хамтран зохион байгуулдаг олон улсын эрдэм шинжилгээний хурал XIV дэх удаагаа 2019 оны 12 сарын 6-ны өдөр зохион байгуулагдах гэж байна. Эрхэм хүндэт профессор, багш нар, та бүхнийг өргөнөөр оролцохыг урьж байна.

Хурлын зорилго:

ОХУ-ын Плехановын нэрэмжит ЭЗИС-ийн УБ дахь салбар сургуультайхамтран жил бүр зохион байгуулдаг энэхүү олон улсын эрдэм шинжилгээний хурлаар санхүүгийн салбарын өнөөгийн байдал, тулгамдаж буй асуудлууд, цаашдын хөгжлийн чиг хандлагын чиглэлээр Монгол Улс, ОХУ болон бусад орны судлаачид, эрдэм шинжилгээний байгууллага, ОУБайгууллага, ЗГ-ын хэрэгжүүлэгч агентлагууд, бизнесийн байгууллагын төлөөллийг оролцуулан илтгэлүүд хэлэлцүүлдэг уламжлалтай.

Санхүүгийн зах зээлийн сүүлийн үеийн судалгаа, шинжилгээний ажлуудын үр дүнг танилцуулах, хэлэлцүүлэг хийх, оролцогч талуудын хамтын ажиллагааг өргөжүүлэх, шаардлагатай зөвлөмж, саналыг боловсруулан гаргахад энэхүү хурлын зорилго оршино.

Ерөнхий зохион байгуулагч:

МУИС-ийн Бизнесийн сургуулийн Санхүүгийн тэнхим

Хэзээ:

2019 оны 12 дугаар сарын 06, Баасан гараг, 9.00 цаг

Хаана:

МУИС-ийн номын сан 502 тоот

Хурлын илтгэлийн үндсэн чиглэл:

• Банк, даатгал, хөрөнгийн зах зээлийн тулгамдсан асуудлууд, шийдвэрлэх арга зам
• Санхүүгийн зах зээлийн хөгжлийн орчин үеийн чиг хандлага
• Санхүүгийн зах зээлийн хөгжилд төрийн оролцоо, үүрэг

Хуралд оролцогчдын хамрах хүрээ:

Монгол Улс, ОХУ болон бусад орны их, дээд сургуулийн профессор багш нар, ахисан түвшний суралцагсад, Олон улсын байгууллага, Засгийн газрын хэрэгжүүлэгч агентлагийн мэргэжилтнүүд, бизнесийн байгууллага, судалгааны төвийн  ажилтнууд, судлаачид өөрсдийн илтгэл, өгүүллийг ирүүлэх боломжтой.

Илтгэлд тавигдах шаардлага:

• Microsoft word программ дээр Times New Roman фондоор бичих, үсгийн өндөр 12pt, мөр хоорондын зай 1.15, А4 форматаар 6-10 хуудсанд багтсан байх;
• Өгүүлэл нь монгол, англи, орос хэлний аль нэг дээр бичигдсэн байх ба хураангуйг англи эсвэл орос хэл дээр бичнэ;
• Эхний нүүрэнд зохиогчийн овог нэр, эрдмийн зэрэг цол, байгууллага, емайл хаяг заавал бичигдсэн байх;
• Өгүүлэл нь хураангуй, түлхүүр үг, оршил, судалгааны хэсэг, үр дүн, дүгнэлт санал, ашигласан материалын жагсаалт гэсэн ерөнхий бүтэцтэй, эшлэл зүүлт ашигласан байх;
• Шалгарсан илтгэлийг хурлаар хэлэлцүүлэх ба хэлэлцэгдсэн илтгэл болон шаардлага хангасан өгүүллийг бүрэн эхээр ISSN индекс бүхий мэргэжлийн түвшинд хянагддаг Мөнгө-Санхүү сэтгүүлд эмхэтгэж хэвлэнэ.
• Илтгэлийг РРТ хэлбэрээр 10-15 минутад багтаан танилцуулна.

Хурлын илтгэл, өгүүллийг хүлээн авах хугацаа:

• Илтгэл, өгүүллийг бүрэн эхээр нь 2019 оны 11 дүгээр сарын 15-ны дотор bayanturn@yahoo.com цахим хаягаар,
• Илтгэлийн РРТ-ийг 2019 оны 11 дүгээр сарын 30-ны дотор tuvshood@yahoo.com цахим хаягаар илгээнэ.

Холбогдох утас: 99009512, 99235555

МУИС-ийн БС-ийн Санхүүгийн тэнхим

Бизнесийн сургуулийн Нягтлан бодох бүртгэлийн тэнхимийн оюутнуудын урлагын бага наадам 2019

2019-2020 оны хичээлийн жилийн Бизнесийн сургуулийн Нягтлан бодох бүртгэлийн тэнхимийн оюутнуудын урлагын бага наадам 2019 оны 10 сарын 13-ны өдөр амжилттай зохион байгуулагдаж өндөрлөлөө. Урлагын бага наадамд Мэндчилгээ, Ардын урлаг, Гоцлол дуу, Хамтлаг бүжиг, Чөлөөт үзүүлбэр гэсэн 5 төрлөөр оюутнууд авъяас чадвараа сорин өрсөлдлөө.

Шилдэг үзүүлбэрийн эздээр:

Мэндилгээ – Н.Дамдиндорж багштай 4-6 анги

Ардын урлаг – Л.Оюунцэцэг багштай 4-4 анги

Гоцлол дуу – 3-4 ангийн оюутан М.Саранмарал

Хамтлаг бүжиг – Н.Дамдиндорж багштай 4-6 анги

Чөлөөт үзүүлбэр – Н.Дамдиндорж багштай 4-6 анги тус тус шалгарсан ба

Нийлбэр оноогоор

1-р байранд Н.Дамдиндорж багштай 4-6 анги

2-р байранд Л.Оюунцэцэг багштай 4-4

3-р байранд Б.Болор багштай 3-2 анги

“LOST & FOUND” шилэн хорго ажиллаж эхэллээ

Сургуулийн багш, оюутнууд анги танхимдаа ном, дэвтэр, гар утас, флаш диск, хувцас, малгай зэрэг ямар нэг эд зүйлсээ орхин мартаж гарч явдаг тохиолдол их гардаг билээ. Тэгвэл өнөөдрөөс хичээлийн байрны 1 давхарт жижүүрийн хажууд шилэн хоргонд  заал, анги, танхимуудаас гээсэн орхисон эд зүйлсийг хүлээлгэж өгөх, хүлээн авах Lost & found шилэн хорго ажиллуулж эхэлснийг дуулгахад таатай байна. Уг хайрцгийг Даатгал хөтөлбөрийн ангийн “Risk management & Insurance” клубийн багш, оюутнууд санаачлан хэрэгжүүллээ.

Та бүхэн гээж орхигдуулсан эд зүйлс олсон даруйнд сургуулийн жижүүрт хаанаас хэзээ олсноо хэлэн тэмдэглүүлэн хүлээлгэн өгснөөр цоожтой шилэн хоргоноос нотолгоо баримттай эзэн нь ирэх хүртэл байрлуулах юм.

Жич: Шилэн хоргыг шинээр угсархад тусалсан Даатгал-3 ангийн оюутнууд болон сургуулийн мужаан Мөнхөө ахад талархсанаа илэрхийлье.

“БИЗНЕСИЙН ГАЗАРЗҮЙН МЭДЭЭЛЛИЙН СИСТЕМИЙН ХЭРЭГЛЭЭ” сэдэвт сургалт зохион байгуулагдана

Бизнесийн газарзүйн мэдээллийн системийн хэрэглээ сэдэвт сургалт 2019 оны 5 сарын 16-ны өдөр МУИС-ийн Төв номын сан, 6 давхар 602 тоот лабораторийн өрөөнд зохион байгуулагдана.

“Career fair 2019” ажил мэргэжлийн арга хэмжээг амжилттай зохион байгууллаа

МУИС-ийн Бизнесийн сургууль нь төгсөгчдийн хөдөлмөр эрхлэх боломжийг нэмэгдүүлэх, ажил олгогч аж ахуйн байгууллагуудад тус сургуулийн төгсөгчдөөс хүний нөөцөө бүрдүүлэхэд нь дэмжлэг үзүүлэх, төгсөгчдөд хөдөлмөрийн зах зээлийн талаарх мэдээлэл өгөх, тэднийг нээлттэй ажлын байранд зуучлах, их сургууль, төр, хувийн хэвшлийн байгууллагын хамтын ажиллагааг өргөжүүлэх зорилгоор “Career fair 2019” ажил мэргэжлийн арга хэмжээг 2019.04.26-ны өдөр  зохион байгууллаа.

Энэхүү арга хэмжээнд Emart,  “Mongolian Economy” Эдийн засаг, бизнесийн сэтгүүл, Худалдаа хөгжлийн банк, Хас банк, Транс банк, Богд банк, Монгол даатгал, Тесо групп, Номин холдинг,  Deliotte ХХК, MMCG ХХК, Анунгоо ХХК,  “Хаан шоргоолж” ХХК зэрэг хувийн хэвшлийн томоохон аж ахуйн нэгжүүдээс гадна төрийн болон төрийн бус байгууллагууд хүрэлцэн ирж манай сургуулийн шилдэг оюутан, суралцагчидтай уулзаж нэгэн дор цугларч, ажил мэргэжлийн уулзалтуудыг амжилттай хийлээ.

МУИС, БС-ийн магисртын хаврын эрдэм шинжилгээний хурал боллоо

Магистрын эрдэм шинжилгээний  хуралдаан 2019 оны 04-р сарын 24-ны өдөр 15:00 цагаас МУИС-ийн хичээлийн IV байрны 314 тоот өрөөнд боллоо.

Тус эрдэм шинжилгээний хуралд дараах нэр бүхий магистрантуудын судалгааны ажилтай танилцаж, хэлэлцсэн байна.  Үүнд:

1. Маркетингийн  хөтөлбөрийн судалгааны магистрант П.Түвшинмандах, Удирдагч багш Б.Даваасүрэн

Сэдэв: Брэндийн дүр төрх нь хэрэглэгчийн худалдан авах шийдвэр гаргалтад нөлөөлөх нь

1. Маркетингийн  хөтөлбөрийн судалгааны магистрант М.Долгорсүрэн,  Удирдагч багш Я.Отгонсүрэн

Сэдэв:Автомашин борлуулагч байгууллагуудын сошиал медиа идэвхжүүлэлтийн судалгаа

1. Санхүүгийн  хөтөлбөрийн судалгааны магистрант З.Энхболд,  Ц.Оюут Удирдагч багш Д.Намжил  

Сэдэв:Давхар бичилт ба Финтекийн хувьсал  

1. Санхүүгийн хөтөлбөрийн судалгааны магистрант Г.Эрдэнэцогт,  Удирдагч багш Д.Сувдаа

Сэдэв: Орон нутаг дахь хөнгөлөлттэй зээлийн хэрэгжилт, үр дүнг дээшлүүлэх боломж 

Хуралд оролцсон нийт магистрантуудад эрдэм шинжилгээний 1 кредит тооцож, батламж гардуулан өгөв.

Ж.ПИТЕР МОРРОУГИЙН НЭРЭМЖИТ ОЛИМПИАДАД БИЗНЕСИЙН СУРГУУЛИЙН ОЮУТНУУД ТЭРГҮҮЛЛЭЭ

У Ж.Питер Морроугийн нэрэмжит ХААН Банкны олимпиадыг энэ жил найм дахь жилдээ амжилттай зохион байгуулж, өнөөдөр шилдгүүдээ тодрууллаа. Банк санхүүгийн чиглэлээр суралцаж буй оюутнуудын дунд жил бүр уламжлал болгон зохион байгуулдаг тус олимпиад энэ сарын 20-23-нд болж, төрийн болон хувийн хэвшлийн 7 их дээд сургуулийн 14 багийн  нийт 70 оюутан оюун ухаанаа сорин өрсөлдсөн юм.

   Олимпиад эрсдэлийн менежмент, зах зээлийн эрсдэл, банкны тухай хууль, ня-бо бүртгэлийн цогц бодлого, зээлийн эрсдэлийн шинжилгээ, худалдааны санхүүжилт, банкны менежментийн сэдвийн хүрээнд явагдсанаас ганцаарчилсан төрөлд тэргүүн байрт СЭЗИС-ийн 3-р дамжааны оюутан Н.Баясгалан, дэд байрт МУИС-ийн 4-р дамжааны оюутан А.Өнөрбуян, гуравдугаар байрт “Мандах бүртгэл” их сургуулийн 4-р дамжааны оюутан Б.Буянжаргал шалгарлаа. Харин “Мандах бүртгэл” их сургуулийн 4-р дамжааны оюутан Х.Ариунаа, МУИС-ийн 4-р дамжааны оюутан Б.Амаржаргал нар ижил оноогоор 4, 5-р байрт байрын эзэд болсон юм. Ялагчид буюу эхний 5 байрт шалгарсан оюутнууд батламж, мөнгөн шагналаас гадна ХААН Банкинд ажиллах урилга гардан авдаг нь оюутнуудад хамгийн том шагнал болдог гэдгийг олимпиадад оролцогчид болон их, дээд сургуулийн багш нар онцолж байлаа. Мөн олимпиадад оролцогчдоос 3-р дамжааны шилдэг нэг оюутанд Ж.Питер Морроугийн нэрэмжит тэтгэлэг олгодог уламжлалын дагуу энэ удаа ганцаарчилсан төрөлд тэргүүлсэн, СЭЗИС-ийн оюутан Н.Баясгалан 500,000 төгрөгийн тэтгэлэг хүртэхээр боллоо.    

   Харин багийн төрөлд СЭЗИС-ийн хоёр, МУИС-ийн хоёр, ИЗСЭЗС-ийн нэг баг айргийн тавд шалгарснаас МУИС-ийн “Platinum” баг тэргүүн байрт шалгарч өргөмжлөл, 1,5 сая төгрөгийн эзэд болсон бол СЭЗИС-ийн “UFERAS” баг дэд байрт шалгарч өргөмжлөл, 1 сая төгрөг хүртлээ. Ганцаарчилсан болон багийн нийт дүнгээр МУИС-ийн оюутнууд тэргүүлж, шилжин явах цом хүртсэн юм. Өнгөрсөн жил шилжин явах цом гардаж байсан МУИС-ийнхан хүчтэй өрсөлдөгч байж энэ жил амжилтаа ийнхүү баталж чадлаа.

   Олимпиад зохион байгуулах комисст өмнөх жилүүдийн банкны олимпиадад шалгарч Төв ХААН Банкны газарт хэлтсүүдэд ажиллаж буй шилдэг залуус оролцсон бөгөөд ХААН Банкны удирдлагын хорооны болон газар хэлтсийн захирлууд олимпиадыг шүүн шилдгүүдийг шалгарууллаа.